काठमान्डौ/सिरहामा एक प्रहरी जवानलाई हातखुट्टा बाँधेर यातना दिएको घटना बाहिरिएको छ । प्रहरी जवान अनु रायलाई बाँधेर यातना दिइएको भिडियो अहिले सामाजिक सञ्जालमा भाइरल बनेको छ ।
पीडित पक्षले प्रहरी निरीक्षक (इन्स्पेक्टर) हेमन्त राईले रायलाई यातना दिएको आरोप लगाएको छ । यस विषयमा सुरक्षा निकायको बैठक बसेको छ ।
इन्स्पेक्टर राईकै कमान्डमा जवान रायलाई निरन्तर अधिक ड्युटी गराएपछि उनले हवल्दारसँग गुनासो पोखेका थिए । हवल्दारले उनको गुनासो इन्स्पेक्टर राईलाई सुनाए । त्यसपछि पीडित रायलाई इन्स्पेक्टर राईले बोलाएका थिए । त्यस क्रममा इन्स्पेक्टर राईले गालीगलौज गरेपछि दुवै जनाबीच विवाद भएको पीडितका भाइ रजनीश रायको दाबी छ । भनाभनपछि उनलाई बाँधेर यातना दिइएको रजनीश बताउँछन् ।
तर, आफूहरूले कुनै प्रकारको याताना नदिएको प्रतिक्रिया दिएको छ । सिरहाका एसपी टेकुनन्द इवालिम्बुले प्रहरीबाट हिर्काउने, पिट्ने जस्ता कुनै काम नभएको बताए । उनका अनुसार प्रहरी जवान रायले अमर्यादित क्रियाकलाप गरी आक्रामक रूपमा प्रस्तुत भएपछि प्रहरीले उनलाई हत्कडी लगाएको हो।
