काठमान्डौ/बाँकेको कोहलपुरमा प्रहरीले लागुऔषध कारोबारीलाई गोली हानेर नियन्त्रणमा लिएको छ । काठमाडौंबाट खटिएको लागुऔषध नियन्त्रण ब्युरोको टोलीले कारोबारी सुशील परियारलाई नियन्त्रणमा लिने क्रममा बिहीबार गोली चलाएको हो ।
उनीबारे थप विवरण भने आउन बाँकी रहेको लुम्बिनी प्रदेश प्रहरी प्रमुख डीआईजी कुवेर कडायतले जानकारी दिए । परियारलाई लागुऔषध नियन्त्रण ब्युरोको टोलीले गोली हानेर नियन्त्रणमा लिएको हो । परियारको भेरी अस्पताल नेपालगञ्जमा उपचार भइरहेको छ । उनको घुँडामा गोली लागेको ब्युरोका प्रमुख गोविन्द थपलियाले जानकारी दिए । उनको साथबाट प्रहरीले ११० ग्राम खैरो हिरोइन बरामद गरेको छ ।
लागुऔषध कारोबारीको खोजीका लागि ब्युरोको टोली पछिल्लो समय देशभर अपरेशनका लागि खटिएको छ । केही दिन अघिमात्रै झापामा समेत गोली प्रहार गरेर एकजनालाई नियन्त्रणमा लिएको थियो ।
