काठमाडौँ/रेडियो नेपालले यस वर्षको राष्ट्रिय स्रष्टा सम्मानबाट वरिष्ठ गीतकार, गायक तथा सङ्गीतकार माधव श्रेष्ठ ‘मोहित’ र वरिष्ठ प्रसारक धन लामालाई सम्मान गरेको छ ।रेडियो नेपालको ७३औँ वार्षिकोत्सवका अवसरमा यहाँ आज आयोजित समारोहमा सञ्चार तथा सूचना प्रविधिमन्त्री रेखा शर्माले रू ५१ हजार राशिसहित सो सम्मान प्रदान गर्नुभयो ।कार्यक्रममा वार्षिकोत्सवका अवसरमा आयोजित ‘आधुनिक गीत प्रतियोगिता’ मा प्रथम, द्वितीय र तृतीय हुने क्रमशः ममता गुरुङ (कास्की) मुना ठटाल (पाँचथर) र सरोज परियार (भक्तपुर) लाई सम्मान तथा पुरस्कार प्रदान गरिएको थियो ।
सोही अवसरमा सञ्चार मन्त्रालयका सचिव तथा रेडियो प्रसार सेवा विकास समितिका अध्यक्ष कृष्णबहादुर राउतले रेडियो नेपालले अल्पसङ्ख्यक, पिछडिएका, आदिवासी, जनजातिसहित सबै नेपालीको रुचि र मागअनुरुपका प्रसारण सामग्रीका माध्यमबाट समाज परिर्वतनमा समेत सकारात्मक भूमिका निर्वाह गर्दै आएको बताउनुभयो ।‘राष्ट्रिय रेडियो राष्ट्रको सञ्चार’ रेडियो नेपालले संसारमा आएको नवीनतम प्रविधिको उपयोग गर्दै आफ्नो प्रसारण सेवा करिब ९२ प्रतिशत जनसङ्ख्यामा पु¥याएको छ । विसं २००७ चैत २० गते स्थापना भएको रेडियो नेपालले हाल २१ भाषामा समाचार र २० भाषामा कार्यक्रम एवं समयसापेक्ष गीत÷सङ्गीतलगायत कार्यक्रम प्रस्तुत गर्दै आएको छ ।
रेडियो नेपालका कार्यकारी निर्देशक बुद्धिबहादुर केसीले प्रगति प्रतिवेदन प्रस्तुत गर्दै विगत वर्षदेखि नै रेडियो नेपालले आफ्नो प्रसारण भुसतही र डिजिटल दुवै प्रविधिमा सञ्चालन गरिरहेका कारण रेडियो नेपाल, नेपालभित्र र विदेशका जुनसुकै ठाउँमा पनि सुन्न सकिने बताउनुभयो ।हाल रेडियो नेपालले मिडियम वेभ, एफएम र डिजिटल प्रविधिमार्फत सेवा सञ्चालन गरिरहेको छ । डिजिटल प्रविधिमा रेडियो नेपाल एप, ओटिटी, न्युज पोर्टल र सोसल मिडियामार्फत आफ्नो प्रसारणलाई विश्वभरि फैलाएको छ । यसै वर्षदेखि डिआरएम प्रविधिमा पनि रेडियो नेपालले आफ्नो प्रसारण सञ्चालन गर्ने तयारी गरिसकेको छ ।
निर्देशक केसीले भन्नुभयो, “स्रोताको रोजाइ र सुलभ प्रविधिका कारण नेपालमा एफएम रेडियोको लोकप्रियता बढ्दो छ, यसै तथ्यलाई मनन गरी रेडियो नेपालले एफएम व्याण्डमा देशैभरि आफ्नो प्रसारण पहुँच वृद्धि गर्दै लैजाने लक्ष्य लिएको छ, एफएम÷एएमको डिजिटल प्रविधिमा रुपान्तरणका लागि आवश्यक अध्ययन प्रतिवेदन तयार गर्ने कार्य पनि अन्तिम चरणमा पुगेको छ ।”
पन्ध्रौँ पञ्चवर्षीय योजनासम्ममा रेडियो प्रसारणको पहुँच शतप्रतिशत भू्भागमा पु¥याउने नेपाल सरकारको नीतिअनुरुप यसवर्ष गण्डकी प्रदेश पर्वत जिल्लाको दुर्लङकोट, कोशी प्रदेश पाँचथर जिल्लाको सिलौटीडाँडा र लुम्बिनी प्रदेश दाङ जिल्लाको चौपट्टामा एफएम रिले स्टेसनमार्फत प्रसारण आरम्भ गरिएको छ ।प्रसारण पहुँच वृद्धिको योजनालाई निरन्तरता दिएको छ भने नयाँ स्थापना भएका एफएम रिले स्टेसनसहित रेडियो नेपालका एफएम रिले स्टेसनको सङ्ख्या ३० पुगेको प्रतिवेदनमा उल्लेख छ ।
