काठमान्डौ/चेल्सीका कालिडोउ कौलीबाली युरोपियन फुटबल छोडेर साउदी प्रो लिगमा अनुबन्ध हुने पछिल्लो खेलाडी बनेका छन् ।
सेनेगलका रक्षक कौलीबालीलाई साउदी प्रो लिगको क्लब अल हिलालले अनुबन्ध गरेको हो । स्टाम्फोर्ड ब्रिजमा एक सिजन बिताएका कौलीबालीका लागि चेल्सीले आइतबार बिदाइ सन्देश लेखेको छ । ‘हामी कौलीबालीलाई क्बलमा पुर्याएको योगदानप्रति धन्यवाद दिन चाहन्छौँ । र, आउँदो करियरका लागि शुभकामना दिन चाहन्छौँ,’ चेल्सीको वेबसाइटमा लेखिएको छ ।
चेल्सीले कौलीबालीलाई चारवर्षे सम्झौतामा अनुबन्ध गरेको थियो । तर, सेनेगलका रक्षकले स्टाम्फोर्ड ब्रिजमा आशातित छाप छोड्न असफल रहे ।
उनले चेल्सीका लागि सबैखाले प्रतियोगितामा गरी ३२ खेल खेले । यसअघि, चेल्सीकै एन्गोलो कान्टे पनि साउदी प्रो लिगकै क्लब अल इतिहादमा अनुबन्ध भएका थिए ।
