काठमान्डौ/काठमाडौंको नयाँ बसपार्कमा पार्किङ गरिराखिएको बसभित्र एक जना युवक मृत भेटिएका छन् ।
नयाँ बसपार्कको ३ नम्बर गेटनजिकै पार्किङ गरिराखिएको बा २ ख २३४४ नम्बरको बसभित्र सुनसरीको इटहरी उपमहानगरपालिका- १३ का ३७ वर्षीय प्रल्लाद अधिकारी मृत भेटिएका हुन् । जिल्ला प्रहरी परिसर काठमाडौंका एसपी नवराज अधिकारीले अधिकारीको शव भेटिएको बस दुई महिनादेखि पार्किङ गरिराखिएको पाइएको बताए ।
उनका अनुसार अधिकारी बसपार्कभित्र यातायात क्षेत्रमै काम गर्दै आइरहेका थिए । उनको शव पोस्टमार्टमका लागि महाराजगञ्जस्थित त्रिवि शिक्षण अस्पताल पठाइएको एसपी अधिकारीले बताए । घटनाबारे थप अनुसन्धान भइरहेको उनले बताए ।
